莎莉迷你奶皇月餅 (附食譜)

好多年冇整月餅，眼見奶皇月餅年年加價，仲要經常缺貨，朋友想買也買不到，心癢癢手痕痕之下，就跟熊子一起齊齊整月餅，將莎莉廚房變成月餅工場，哈！

上星期跟了兩個不同食譜，整了兩款奶皇月餅，比較研究之下，將兩個食譜合拼取長補短，然後再作出少少改量，造出了一款更啱自己口味的奶皇月餅！這就成了今年的"莎莉奶皇月餅"喇。哈！

多謝好友們俾面捧場，跟我訂製數十個月餅，亦要特別嗚謝熊子出手相助，令月餅可準時出爐!!! THANK YOU!!!!!!

而家就係呢度分享一下食譜啦!!

迷你奶皇月餅（16個）

＜奶皇餡＞  [要預先一晚預備]
淡忌廉      76克
砂糖　　  40克
雲尼拿條  半條
椰汁　　  80克
鮮奶          40克
牛油　　  46克

吉士粉　 50克
奶粉　　 56克
鮮奶        30克

雞全蛋　 50克（約1隻）
雞蛋黃　 30克（約2隻）
砂糖　     40克

鹹蛋黃　　 8隻

＜月餅皮＞
砂糖　　　 40克
牛油　　　 130克
雞蛋　　　 22克
花奶　　　 25克
低筋麵粉　 252克
吉士粉　　 17克

＜掃面糖水＞
砂糖20g + 水20g ,煮滾後熄火放涼備用。

＜鹹蛋黃 ＞
用約1茶匙白蘭地撈勻，入180度焗爐焗約10分鐘，放涼後用食物處理器攪碎備用。

先做月餅餡：
1. 將吉士粉(50克)及奶粉(56克)過篩備用。
2. 50克雞蛋、30克蛋黃打散，加入40克糖拌勻，再加入30克鮮奶攪勻，再加入吉士粉及奶粉拌勻，備用。

3. 將80克椰汁+40克奶+76克淡忌廉+46克牛油+40克糖及雲尼拿半條以細火煮滾，邊煮邊攪拌。

4. 煮滾後過篩加入#2中拌勻。

5. 滾水落鍋蒸 15-20分鐘，拿出撈勻，略搓，攤凍即成奶皇餡，放入雪櫃雪一晚，備用。

做餅皮︰
1. 130克牛油加入40克砂糖用打蛋器打至發身浮起，然後分2-3次加入22克雞蛋及25克花奶，打勻。

2. 然後分3-4次加入已篩252克麵粉及17克吉士粉，慢速攪勻。放入雪櫃雪一小時。

組合月餅：
1. 焗爐預熱230度。(我家焗爐)
2. 奶皇餡從雪櫃取出，加入鹹蛋黃碎搓勻，分成16份約30克一粒，備用。

3. 月餅皮粉糰從雪櫃取出，分成16份約30克一粒，備用。

4. 每粒粉糰包入1粒奶皇餡，月餅先撲上小量麵粉，光滑一面放入月餅模中造型。留意餅模一定要灑上足夠麵粉(又不能太多)，以免黏着月餅皮。

5. 月餅入爐先焗 5分鐘，取出月餅掃薄薄一層蛋漿（全蛋），吹乾約 10分鐘後，再掃一層蛋漿，然後再入爐焗 4分鐘，取出掃一層糖漿，最後焗一分鐘。大功告成。

小貼士:
1.發覺焗爐一定要夠熱[又不可過熱]及用對流風才減低瀉下(象腳)情況出現，大家不防留意。 
2.想月餅上的花紋清晰，掃蛋漿時一定要薄薄的掃。