韓式牛肋條 (附食譜) -LC25Oval

有朋友到訪，約定8:15pm莎莉廚房開飯，本來簡簡單單家常便飯，但係手痕痕心癢癢之下又搵D好野整吓!!!!! 哈~

炆呢個牛肋條要1個鐘，又要出水又要洗洗切切，最少即係要用1個半小時先夠時間，但又要返工，點算好??? 差點想放棄唔整，幸好相公突然放得早，可以先到街市幫忙買材料，我放工就即刻飛奔返屋企，6:45pm就開始洗洗切切煮煮煮!!! 哈~ 

順順利利8:30pm開飯!! 

**************************************

6人晚餐，5餸1湯, 白飯任裝:

豆腐九肚魚滾湯

清炒菜心

臘腸雲耳炒青瓜

白灼花螺

韓式牛肋條

焗香矛雞扒

**************************************

當我忙碌著韓式牛肋條之時，相公就幫忙切香矛預備醃香矛雞扒，時間有d唔夠咁，哈~ 因為香矛雞扒又耍時間去醃!! 幸好相公出手相助，大家先有咁美味晚餐!!!!! yeah!!!!! 

今次用LC 25Oval炆2磅牛肋條, 剛剛好!!!

韓式炆牛肋條 (4-5人份量)

材料：  
牛肋條         2磅  
甘荀             3條  
白蘿蔔         半個
洋葱             1個  
蒜頭(切片)   3粒  
乾葱(切片)   3粒  
雪梨             1個  
水                  約600ml  
韓式牛肉汁  半枝 (759有售, $18.5)

製法:
1. 乾蔥及蒜頭切片, 雪梨去皮去心切小粒, 甘荀及白蘿蔔去皮切件, 洋蔥切件備用。

2. 牛肋條出水，洗淨備用。 

3. 起鑊落油(我用LC煲)，爆香乾蔥片及蒜片，落一半洋蔥炒香。 

4. 再加入牛助條炒香。

5. 加入水及汁料， 如未能蓋面可自行加水，加入雪梨，煮滾後轉小火炆20分鐘。

6. 然後加入白蘿蔔及甘荀再炆20分鐘。

7. 最後加入剩餘一半洋葱再炆15分鐘即成。